पुणे दि.१६ – पुण्यातील कॅम्प परिसरातील छत्रपती शिवाजी मार्केटमधील मच्छी आणि चिकनच्या दुकानांना मंगळवारी पहाटे भीषण आग लागली. पहाटे झालेल्या या अग्नीतांडवात २५ दुकानं जळून खाक झाली. शॉर्टसर्किटमुळे आग लागली असावी, असा प्राथमिक अंदाज वर्तवण्यात येत आहे.
अग्निशमन दलाच्या अधिकाऱ्यांनी दिलेल्या माहितीनुसार, पुणे शहरातील कॅम्प परिसरात छत्रपती शिवाजी मार्केटमध्ये मच्छी, चिकन आणि अन्य वस्तूंची विक्री मोठ्या प्रमाणावर होत असते. मार्केटमध्ये आज पहाटे पावणेचार वाजण्याच्या सुमारास आग लागल्याची माहिती आम्हाला मिळाली, असं अधिकाऱ्यांनी सांगितलं. या मार्केटमध्ये दुकानांची संख्या मोठ्या प्रमाणात असल्याने, दलाने काही मिनिटांत घटनास्थळी धाव घेतली. मात्र तोपर्यंत आगीचा भडका वाढला होता. या घटनेत मच्छी विक्रेत्यांची १७ आणि चिकन विक्रेत्यांची ८ अशी २५ दुकाने जळून खाक झाली. ही आग शॉर्टसर्किटमुळे लागल्याची शक्यता असून, ८ गाड्यांच्या मदतीने आग आटोक्यात आणण्यात आली.
