पुणे : राज्यात वाढत असलेल्या कोरोना संसर्गाच्या पार्श्वभूमीवर शनिवार आणि रविवार असा विकेंड लॉकडाऊन जाहीर करण्यात आला आहे. मात्र अद्यापहीकोरोना रुग्णसंख्येत झपाट्याने वाढ होताना दिसत आहे. त्यात निर्माण झालेल्या परिस्थितीमुळे राज्य सरकार मोठा निर्णय घेण्याच्या तयारीत आहे. असे संकेत खुद्द उपमुख्यमंत्री अजित पवारांनी पुण्यात दिले आहे.
ते म्हणाले की, आज पुण्यात बैठक आहे. मुख्यमंत्र्यांनी सर्वपक्षीय बैठक बोलवली. त्यामध्ये संपूर्ण महाराष्ट्रासाठी एकच निर्णय घेतला जाईल. प्रत्येक ठिकाणी वेगळा निर्णय घेऊन चालणार नाही. आज बारामतीत बैठक घेऊन इंजक्शन, बेड, लसीकरण, रुग्णवाहिका याचा आढावा घेतला. बारामतीत होत असलेली वाढ रोखण्यासाठी काही निर्बंध लादण्याबद्दल पोलिस यंत्रणेला सूचना दिल्या आहेत”
पुढे बोलताना ते म्हणाले की, राज्य सरकारच्या एकाही हॉस्पिटलमध्ये इंजक्शन कमी पडत नाही. खासगी रुग्णालयांमध्ये तुटवडा आहे. त्यामागे काही कारणे आहेत. त्याबद्दलही चर्चा झाली. जिल्ह्यात याबद्दल कशा पद्धतीने उपाययोजना राबवायच्या याबद्दल पुण्यातील बैठकीत निर्णय घेणार आहोत, असे अजित पवारांनी सांगितले आहे. त्यामुळे बाळासाहेब थोरात यांच्या पाठोपाठ अजित पवारांनी सुद्धा कडक लॉकडाऊनचे संकेत दिले आहे.
