पुणे : राज्यात पुन्हा एकदा कोरोनाने आपलं डोकं वर काढलं आहे. त्यात रुग्णसंख्या सुद्धा झपाट्याने वाढताना दिसत आहे. याच पार्श्वभूमीवर लसीकरण सुद्धा युद्ध पातळीवर सुरु करण्याचे आदेश केंद्र सरकारने सर्व राज्यांना आणि महानगर पालिकांना दिले आहेत. त्यातच आता पुणे महानगरपालिकेने कोरोना प्रतिबंधक लसींची थेट खरेदी करण्याचा निर्णय घेतला आहे. सिरम संस्थेचे प्रमुख अदर पुनावालांची यासाठी भेट घेत १० लाख लसींचा पुरवठा करण्याची विनंती त्यांना करणार असल्याची माहिती पुण्याचे महापौर मुरलीधर मोहोळ यांनी दिली.
सध्या १०० च्यावर केंद्रावर पुणे महानगरपालिकेच्या माध्यमातून लसीकरण सुरु आहे. पण, राज्य सरकार महापालिकेला पुरेशा लस उपलब्ध करून देत नसल्यामुळे वारंवार लसीकरणात अडथळे येत आहेत. अनेक ठिकाणी केंद्र बंद ठेवण्याची वेळ महापालिकेवर येत असल्यामुळे आता पुणे महानगरपालिका थेट लस खरेदी करण्यासाठी प्रयत्न करणार आहे. साधारण १० लाख लसी मिळाव्यात, अशी विनंती महापौर मुरलीधर मोहोळ करणार आहेत.
या विषयी बोलताना महापौर म्हणाले की, लसींची थेट खरेदी करायला आम्ही तयार आहोत. त्यासाठी निधीची तरतूद करण्याचीही महानगरपालिकेची तयारी आहे. त्याच्या चर्चेसाठी सीरम इन्स्टीट्यूटचे सीईओ अदर पुनावाला यांची भेट मागितली आहे. त्यांची वेळ मिळाली की याविषयी त्यांच्याशी चर्चा करण्यात येईल अशा माहिती त्यांनी दिलेली आहे.
