गुजरात- देशात एकीकडे कोरोना रुग्णसंख्या वाढत आहे. तर दुसरीकडे गुजरातमध्ये एक धक्कादायक प्रकार समोर आला आहे. सूरत जिल्ह्यामध्ये चक्क कचरा वाहून नेणाऱ्या ट्रकमधून रुग्णालयात व्हेंटिलेटर नेण्यात आल्याचा धक्कादायक प्रकार समोर आला. व्हेंटिलेटरचा तुटवडा असल्याने ३४ व्हेंटिलेटर ट्रकमधून नेण्यात आले होते.
इंडिया टुडेने दिलेल्या वृत्तानुसार गुजरातमध्ये सोमवारी पहिल्यांदाच दिवसाला तीन हजारांहून जास्त कोरोना रुग्णांची नोंद झाली.
एकीकडे रुग्णसंख्या वाढत असताना दुसरीकडे राज्यात व्हेंटिलेटरचा तुटवडा जाणवत आहे. रुग्णालयांमध्ये तुटवडा भासू लागल्याने गुजरात सरकारने वलसाड येथून सुरतला ३४ व्हेंटिलेटरचा पुरवठा करण्याचा आदेश दिला होता. राज्य सरकारच्या आदेशानंतर सूरत महापालिकेने व्हेंटिलेटर आणण्यासाठी वलसाडला कचऱ्याची वाहतूक करणारा ट्रक पाठवला होता. वलसाडचे जिल्हाधिकारी आर आर रावल यांनी सूरत महापालिकेने पाठवलेल्या वाहनातून व्हेंटिलेटरची वाहतूक झाल्याची माहिती आपल्याला मिळाली असल्याचं म्हटलं आहे. याप्रकरणी चौकशीचे आदेश देण्यात आले असल्याची माहिती त्यांनी दिली आहे.
