संगमनेर- सध्या राज्यात कोरोना रुग्ण वाढल्याने संपूर्ण परीस्थिती गंभीर होत चालली आहे. तर संगमनेरमध्ये एक वेगळाच प्रकार समोर आला आहे. देशी दारूची वाहतूक होत असलेली रूग्णवाहिका संगमनेर शहर पोलिसांनी शुक्रवारी सकाळी अकरा वाजेच्या सुमारास पकडली. कोरोनाचा प्रादुर्भाव वाढल्याने कडक निर्बंध करण्यात आले आहेत त्यामुळे ठिकठिकाणी नाकाबंदी करण्यात आली आहे. तसेच संगमनेर बसस्थानकासमोर नाकाबंदी करण्यात आली आहे.
संगमनेर बसस्थानकासमोर नाक्यावर पोलीस वाहनांची तपासणी करत असताना तेथून जाणाऱ्या रुग्णवाहिका चालकाला शहर पोलीस ठाण्याचे पोलीस निरीक्षक मुकूंद देशमुख यांनी थांबण्याचा इशारा केला. या रुग्णवाहिकेची तपासणी केली असता त्यात मोठ्या प्रमाणात देशी दारु आढळून आली. रुग्णवाहिका व त्यातील दोघांना ताब्यात घेत पोलीस ठाण्यात नेण्यात आले असून या प्रकरणी गुन्हा दाखल करण्याचे काम सुरू आहे.
