मुंबई : राज्यात कोरोना संसर्गाच्या पार्श्वभूमीवर निर्बंध अधिक कडक करण्यात आले आहेत. त्यात राज्य सरकारने कोरोना संसर्गाला थोपवण्यासाठी मिनी लॉकडाऊन जाहीर केला आहे. मात्र तरीही कोरोना संसर्ग रोखण्यासाठी सरकारला अपयश येत आहे. याच पार्श्वभूमीवर ठाकरे सरकार अधिक कडक निर्बंध लादण्याच्या तयारीत असलेले दिसून येत आहे.
तसेच राज्य सरकारकडून एसटी बस सेवेबाबत महत्त्वपूर्ण निर्णय घेतला जाण्याची शक्यता वर्तवली जात आहे. आंतरराज्यीय एसटी वाहतूक बंद करण्याचा विचार राज्य सरकारकडून करण्यात येत आहे. महाराष्ट्र राज्यातून गुजरात, मध्य प्रदेश, छत्तीसगड, तेलंगणा, कर्नाटक आणि गोवा या राज्यांत आंतरराज्य एसटीची प्रवास वाहतूक सुरू आहे.
मात्र तत्पूर्वीच मध्य प्रदेश आणि कर्नाटक सरकारने महाराष्ट्रातील एसटी वाहतूक आधीच बंद केली आहे. त्यामुळे आता राज्य सरकारही इतर राज्यातील एसटी प्रवास वाहतूक बंद करून कोरोना संसर्ग रोखण्यासाठीचा निर्णय लवकरच जाहीर करण्याच्या तयारीत असल्याची माहिती खात्रीदायक सूत्राच्या माध्यमातून समोर येत आहे.
