जळगाव दि.३- जळगाव येथील शासकीय आशादीप महिला वसतिगृहात काही पोलीस कर्मचारी व इतर बाहेरच्या पुरुषांकडून मुलींना कपडे काढून नृत्य करायला भाग पाडल्याचा धक्कादायक प्रकार उघडकीस आला आहे. सामाजिक संघटनांनी मंगळवारी याबाबत जिल्हाधिकाऱ्यांकडे तक्रार केली आहे. त्यात संबंधित कृत्याचा व्हिडिओही सादर केला. जिल्हाधिकारी अभिजित राऊत यांनी याची तातडीने दखल घेऊन चौकशी करण्याचे आदेश दिले आहेत.
गैरप्रकाराच्या अनेक तक्रारी-
महिला व बालकल्याण विभागामार्फत गणेश कॉलनीतील वसतिगृहात निराधार व अन्याय, अत्याचार झालेल्या महिला व मुलींच्या निवारा-भोजनाची व्यवस्था केली जाते.या वसतिगृहात गैरप्रकार घडत असल्याच्या अनेक तक्रारी येत होत्या.
मुलींना जबरदस्तीने करायला लावले नृत्य,सामाजिक कार्यकर्त्यांजवळ मांडली कैफियत-
जननायक फाउंडेशनचे अध्यक्ष फिरोज पिंजारी, फरीद खान, मंगला सोनवणे आदींनी मंगळवारी दुपारी वसतिगृह गाठून महिला व मुलींना भेटून माहिती जाणून घेतली असता १ मार्च रोजी काही पोलीस कर्मचारी व बाहेरील पुरुष यांनी मुलींना कपडे काढून जबरदस्तीने नृत्य करायला भाग पाडले. काही कर्मचाऱ्यांच्या संगनमताने बाहेरील लोकांना व पोलिसांना चौकशीच्या नावाखाली आतमध्ये प्रवेश देऊन अनैतिक कृत्य केले जात असल्याची कैफियत काही मुलींनी मांडली. ज्या मुली चुकीच्या कृत्यांना नकार देतात, त्यांना मारहाण करण्याची धमकी दिली जाते. सामाजिक कार्यकर्त्यांना आतमध्ये प्रवेश देण्यात आला नव्हता, मुली बाहेरूनच खिडकीतून आपल्यावर बेतलेले प्रसंग ओरडून सांगत होत्या. या मुली बोलण्याचा प्रयत्न करीत असताना त्यांनाही संस्थेच्या कर्मचाऱ्यांकडून मज्जाव केला जात होता,अशी कैफियत सामाजिक कार्यकर्त्यांनी मांडली आहे.
जननायक फाउंडेशनच्या कार्यकर्त्यांनी याबाबत जिल्हाधिकारी यांची भेट घेऊन तक्रार दाखल केली आहे.जिल्हाधिकाऱ्यांनी संबंधितांना बोलवून सूचना केल्या. तसेच याबाबत दोषींवर कारवाई करण्यात येईल असे आश्वासनही त्यांनी संघटनेच्या कार्यकर्त्यांना दिले आहे.
