मुंबई पोलीसातून निलंबित केल्या गेलेल्या सचिन वाझे यांच्यासोबत पंचतारांकित हॉटेल मध्ये काही बॅगा घेऊन जाताना सीसीटीव्ही कॅमेऱ्यात दिसलेल्या रहस्यमयी महिलेला एनआयने ताब्यात घेऊन तिची काही तास कसून चौकशी केली आणि त्यानंतर तिला अटक केली गेल्याचे समजते.
अंबानी घराच्या बाहेर सापडलेल्या स्फोटकाप्रकरणी संपूर्ण राज्यात खळबळ उडाली होती. त्यानंतर मनसुख हिरेन प्रकरणावरून मुंबई पोलीस दलातून सचिन वझेन निलंबित करण्यात आले होते, व हा तपास एनआयएच्या हाती देण्यात आला होता.
त्यानंतर आता एनआयएने या हॉटेलची आणि क्लबची गुरुवारी तपासणी केली आणि ठाणे येथील एका फ्लॅटचाही तपास केला तेव्हा ही महिला एनआयएच्या हाती लागली असे समजते. वाझे यांच्या कार मध्ये पाच मोठ्या बॅगा तपासात सापडल्या होत्या. ही महिला काळा पैसा पांढरा करून देण्याचे काम वाझे साठी करत होती आणि त्यासाठी दोन आयडींचा वापर करत होती असे उघड झाले असून तपासात सापडलेली नोटा मोजायची यंत्रे याच महिलेची असल्याचे सांगितले जात आहे.
